EDD-ը կը բարելաւէ կայքի թարգմանութիւնները՝ հասանելի դառնալով Քալիֆորնիոյ միլիոնաւոր այլ բնակիչներու համար

Սաքրամենթօ — Աշխատանքի զարգացման բաժանմունքը (EDD) բարելաւում մը իրականացուց իր կայքին մէջ՝ Քալիֆորնիոյ միլիոնաւոր այլ բնակիչներու հնարաւորութիւն տալով իրենց լաւագոյնս ծանօթ լեզուներով տեղեկութիւն ստանալու գործազրկութեան, հաշմանդամութեան եւ ընտանիքի վճարովի արձակուրդի վերաբերեալ։
Կայքի թարգմանութեան գործիքը կ'աջակցի 14 լեզուներու՝ համայնքներուն տրամադրելով ճշգրիտ եւ յստակ տեղեկութիւններ իրենց նախընտրած լեզուներով։ Սպաներէնի հետ միասին, այս լեզուներով կը խօսին Քալիֆորնիոյ այն բնակիչներուն աւելի քան 90 տոկոսը, որոնք իրենց տուներուն մէջ անգլերէնէն տարբեր լեզու մը կը գործածեն։

Յառաջադէմ արհեստագիտութեան եւ մարդկային մասնագիտական փորձառութեան համադրում

EDD-ը որդեգրած է կայքի թարգմանութեան արդիական մօտեցում մը՝ համադրելով թարգմանական արհեստագիտութիւնն ու մարդկային մասնագիտական փորձառութիւնը, որպէսզի տարբեր լեզուներով տրամադրուող տեղեկութիւնները ըլլան ճշգրիտ, հետեւողական եւ դիւրահասկնալի։

Google Cloud Translation API թարգմանական համակարգը՝ EDD-ի լեզուական յատուկ բառացանկին զուգահեռ, որուն մէջ ներառուած են ծրագիրներու անունները, մասնագիտական եզրերն ու այլ մասնագիտացուած արտայայտութիւնները, կ'օգնէ ապահովելու, որ թարգմանութիւնները ճշգրտօրէն փոխանցեն բարդ նպաստներու եւ ծառայութիւններու մասին տեղեկութիւններուն իմաստը։ EDD-ի Լեզուական հասանելիութեան գրասենեակը շարունակաբար կը վերահսկէ թարգմանութիւններուն որակը եւ կը կատարելագործէ բառացանկը՝ նպաստելով աւելի հետեւողական եւ վստահելի թարգմանութիւններու ստեղծման։

Երբ Բաժանմունքը կը թարմացնէ իր բառացանկը, այդ փոփոխութիւնները կրնան ներառուիլ յաջորդող թարգմանութիւններուն մէջ՝ շարունակաբար բարելաւելով անոնց որակը։

Կայքի թարգմանութեան այս լայնածաւալ նախաձեռնութեան շնորհիւ Քալիֆորնիոյ բնակիչներն այժմ կարեւոր տեղեկութիւններ կրնան ստանալ նպաստներու եւ ծառայութիւններու վերաբերեալ՝ 14 լեզուներով։ Այդ լեզուներն են՝ աւանդական չինարէնը, պարզեցուած չինարէնը, վիեթնամերէնը, թակալոկը, քորէերէնը, հայերէնը, արաբերէնը, պարսկերէնը, փենճապերէնը, ռուսերէնը, ճափոներէնը, հինտիերէնը, մոն-քմերերէնը (քամպոճերէնը) եւ թայերէնը։

Այս արհեստագիտութիւնը նաեւ հիմք կը ստեղծէ ապագային թարգմանութիւնները աւելի քան 100 լեզուներով ընդլայնելու համար, մինչ EDD-ը կը շարունակէ անվճար լեզուական աջակցութիւն եւ բանաւոր թարգմանութեան ծառայութիւններ տրամադրել Քալիֆորնիոյ այն բնակիչներուն, որոնք այլ լեզուներով կը խօսին։

«EDD-ի նման մեծ հաստատութեան մը համար լեզուական հասանելիութեան բարելաւումը կը պահանջէ մտածել, թէ ինչպէս կարելի է այս գործընթացը կազմակերպել հետեւողականօրէն եւ մեծ ծաւալով», ըսաւ EDD-ի Լեզուական հասանելիութեան պատասխանատու Մոլի Վյուն։ «Այս աշխատանքը աւելի ամուր հիմք կը ստեղծէ՝ շարունակաբար բարելաւելու այն միջոցները, որոնց շնորհիւ Քալիֆորնիոյ բնակիչները կրնան օգտուիլ EDD-ի տեղեկատուութենէն եւ հասկնալ զայն»։

EDD-ը անմիջականօրէն կը համագործակցի Քալիֆորնիոյ բազմազան համայնքներուն, համայնքային կազմակերպութիւններուն եւ լեզուական հասանելիութեան ոլորտի գործընկերներուն հետ՝ բացայայտելու լեզուական խոչընդոտները եւ դիւրացնելու իր ծրագիրներու ու ծառայութիւններու հասանելիութիւնը։ Անոնց կարծիքներն ու առաջարկները կ'օգնեն EDD-ին մշակելու աւելի յստակ եւ օգտակար տեղեկատուութիւն, բարելաւելու թարգմանութիւններու որակը եւ Քալիֆորնիոյ բնակիչներուն համար աւելի դիւրին դարձնելու իրենց անհրաժեշտ աջակցութիւնը ստանալը։

Լեզուական հասանելիութիւնը արդիականացման կարեւոր բաղադրիչն է

Կայքի թարգմանութիւններու արդիականացումը EDD-ի աւելի լայն նախաձեռնութեան մէկ մասն է, որուն նպատակն է բարելաւել Քալիֆորնիոյ բնակիչներուն տեղեկատուութեան եւ ծառայութիւններու հասանելիութիւնը։ Վերջին

շրջանին Բաժանմունքը նաեւ ընդլայնած է լեզուական հասանելիութիւնը՝ արհեստագիտութեան կիրառման, Google Public Sector-ի հետ համագործակցութեան եւ սպասարկման այլ բարելաւումներու միջոցով, որոնցմէ են՝

• 24/7 աջակցութիւն՝ ութ լեզուներով․ EDD-ի չաթպոթը կայքի ամբողջ տարածքին հասանելի է օրուան 24 ժամերը՝ ութ լեզուներով, եւ կ'օգնէ յաճախորդներուն առանց EDD հեռաձայնելու` պատասխաններ ստանալու նպաստներու, դիմումներու, աշխատանքի եւ մասնագիտական վերապատրաստման կարելիութիւններու, ինչպէս նաեւ աշխատավարձի հարկերու եւ գործարար ծառայութիւններու վերաբերեալ։
• Գործազրկութեան նպաստի առցանց դիմումներ՝ ութ լեզուներով․ Յաճախորդները կրնան գործազրկութեան նպաստ ստանալու առցանց դիմում ներկայացնել ութ լեզուներով։ Դիմումի աւելի կարճ եւ պարզեցուած ձեւը կը դիւրացնէ գործընթացը հասկնալն ու լրացնելը։
• Գործազրկութեան հարցերով առցանց զրոյց՝ EDD-ի աշխատակիցի հետ․ Գործազրկութեան հարցերով դիմողները կրնան myEDD-ի միջոցով կապ հաստատել EDD-ի աշխատակիցի մը հետ։ Իրական ժամանակի թարգմանչական աջակցութիւնը կ'օգնէ անոնց հաղորդակցելու իրենց նախընտրած լեզուով։
• Լեզուական խոչընդոտներու վերացում՝ արհեստագիտութեան միջոցով․ Բաժանմունքը կ'օգտագործէ խօսքը գրուածքի վերածելու եւ թարգմանելու արհեստագիտութիւն՝ յաճախորդներու ձայնային հաղորդագրութիւնները քանի մը րոպէի ընթացքին աւելի քան 100 լեզուներով գրի առնելու եւ թարգմանելու համար։ Այս գործընթացը ձայնային հաղորդագրութիւններու մշակման ժամանակը կրճատած է 40-էն 50 տոկոսով՝ օգնելով աշխատակիցներուն աւելի արագ պատասխանելու յաճախորդներուն։
• Ընդլայնուած ծառայութիւններ՝ խուլ եւ լսողութեան դժուարութիւններ ունեցող յաճախորդներուն համար․ EDD-ը կը տրամադրէ տեսազանգի միջոցով հեռավար թարգմանչական ծառայութիւններ՝ ամերիկեան ժեստերու լեզուով (ASL) իրական ժամանակի մէջ կամ նախապէս նշանակուած ժամու թարգմանութիւն ապահովելու համար։ Բաժանմունքը կը շարունակէ նաեւ անձամբ մատուցել ASL թարգմանչական ծառայութիւններ՝ նախապէս ժամադրութիւն ամրագրելու պարագային։

Լեզուական հասանելիութիւնը յաճախորդներուն աւելի լաւ սպասարկում ապահովելու կարեւոր բաղադրիչն է։ EDD-ը կը շարունակէ տեղեկատուութիւնը աւելի յստակ դարձնել, ընդլայնել ծառայութիւններու հասանելիութիւնը եւ Քալիֆորնիոյ միլիոնաւոր բնակիչներուն համար դիւրացնել Բաժանմունքի ծրագիրներէն ու ծառայութիւններէն օգտուիլը։

EDD-ը կը հրաւիրէ Քալիֆորնիոյ բնակիչներուն բաժանորդագրուելու իր Benefiting Californians լրատուական տեղեկագրին` հետեւելու Բաժանմունքի արդիականացման շարունակական աշխատանքներուն եւ յաճախորդներու սպասարկման բարելաւումներուն։